Arrestohet ish-drejtori i Kadastrës në Vlorë, i sekuestrohen 60 mijë euro

Ish-drejtori i Kadastrës së Vlorës, Klodian Troci është arrestuar nga policia pasi dyshohet për shpërdorim detyre gjatë detyrës së mbajtur në Këshillin e Qarkut Vlorë.

Trocit gjatë kontrollit në banesë nga shërbimi i policisë gjyqësore i janë gjetur 60 mijë euro. Bashkë me paratë i janë sekuestruar dhe disa prova të tjera materiale. Ndaj Trocit është caktuar masë sigurie arrest me burg.

Bashkë me Trocin po hetohen dhe disa zyrtarë të tjerë të Këshillit të Qarkut të Vlorës pasi akuzohen se kanë pranuar dokumente të falsifikuara nga një banor i Dhërmiut, i cili gjithashtu është në hetim.

Hetimet për këtë rast nisën pasi nga Këshilli i Qarkut Vlorë i vodhën praktika dhe 33 fashikuj gjyqësor origjinalë, që i përkasin fondit arkivor të Gjykatës së Rrethit Gjyqësor Vlorë.

Troci ka mbajtur për gati tre muaj postin e drejtorit në drejtorinë e administrimit dhe mbrojtjes së tokës pranë Këshillit të Qarkut në 2020 dhe më pas është emëruar drejtor në Kadastër.

Ai u tërhoq nga detyra disa ditë më parë pasi mbajti postin e drejtuesit në Kadastrën e Vlorës për rreth 3 muaj dhe është zëvendësuar nga Bardhyl Gjika.

LEXONI GJITHASHTU:

• Jep dorëheqjen drejtori i Hipotekës së Vlorës