Abazi: Me dorëheqjen mora përgjegjësi për humbjen në zgjedhje

Boiken Abazi tha në Euronews Albania se ka dhënë dorëheqjen nga drejtimi i Vetëvendosjes për të marrë përgjegjësi për humbjen në zgjedhjet e 25 prillit në Shqipëri.

Abazi tha se nuk ka dashur të fshehet prapa kësaj vjedhjes së votave për rezultatin, pavarësisht se shtoi se LVV e ka faktuar atë në zgjedhjet e përgjithshme.

I pyetur se a është i zhgënjyer personalisht nga zgjedhejt e 25 prillit dhe se a ka pasur pritshmëri më të larta, Abazi tha se sigurisht se kanë dashur të kenë të paktën një mandat në Kuvendin e Shqipërisë, por se nuk ka qenë prioriteti i partisë në Shqipëri.

“Gjëja më e rëndësishme është që të rritet organizata, të përhapet fryma e Lëvizjes, dhe e treta ka qenë mandati”, tha Abazi.

Abazi tha se do të vazhdojë të jetë pjesë e kësaj partie dhe u shpreh se mbetet për t’u parë forma e re që do të marrë LVV në Tiranë pas largimit të tij.

“Nuk e di formën e re ose nëse do të vazhdojë në këtë formë apo do të marrë një formë të re, për momentin prioritet janë zgjedhjet dhe balotazhi në Kosovë”, tha ai.

Abazi tha se Shqipëria ka nevojë për një subjekt politik siç është Lëvizja Vetëvendosje, që lidh social-demokracinë dhe shtetin zhvillimor me vullnetin e shqiptarëve për bashkimin kombëtar.

Në zgjedhjet e 25 prillit në Shqipëri, Boiken Abazi garoi si kandidat i pavarur në Tiranë, nën siglën e Vetëvendosjes, por nuk mundi të merrte mandatin e deputetit.

I pyetur për rezultatin e Vetëvendosjes në zgjedhjet lokale në Kosovë, Abazi tha se VV mori votën popullore dhe se krahasuar me veten në vitet e mëparshme pati rritje të lartë.

Megjithatë Abazi shtoi se mbetet për t’u analizuar performanca në komuna.

LEXONI GJITHASHTU:

• Boiken Abazi jep dorëheqjen nga drejtimi i LVV në Shqipëri