‘Qeveria përndoqi Becchettin’, Arbitrazhi: Shteti shqiptar do paguajë 108 mln euro për sulme politike

Vendimi për gjyqin e fituar nga Francesco Becchetti kundër qeverisë shqiptare nuk është më sekret. Biznesmen italian, me një sërë investimesh në Shqipëri, përfshi TV Agon Channel dhe HEC-in e Kalivaçit, pret të marrë nga shteti ynë mbi 108 mln euro.

Gjykata e Arbitrazhit i hodhi poshtë si të pabaza akuzat e qeverisë shqiptare ndaj biznesmenit italian.

Akuzat e para nga qeveria nisen për pastrim parash kundër Maurizio De Renzis, si emri që fshihej pas bizneseve të Becchettit, por ne fakt nuk ishte. Becchetti u kallëzua edhe për sulm ndaj një roje në aeroportin e Rinasit, por Arbitrazhi e gjykon këtë kallëzim në kundërshtim me Kodin Penal Shqiptar.

Pas kësaj, shteti nxitoi t’ia merrte bizneset, por vendimi i konfiskimit u “formulua në mënyrë të paqartë”, dhe nuk mund të ekzekutohej.

Këto dhe përfundime të tjera në vendimin e Gjykatës së Arbitrazhit tregojnë se ndaj Becchettit u orkestrua një sulm i ashpër politik, por që solli kosto të lartë për shtetin.

Partia Demokratike kërkoi para disa ditësh hapjen e një hetimi për përgjegjësinë e zyrtarëve shqiptarë në lidhje me çështjen e Arbitrazhit, që u rrëzua nga mazhoranca për arsye konfidencialiteti.