Harta e re gjyqësore, KLGJ: Nuk kemi një dokument zyrtar të dakortësuar me ministrinë

Flitet si nevojë prej 1 viti, por harta e re gjyqësore ende nuk ka shkuar për miratim në qeveri. KLGJ duket se nuk po e gjen gjuhën e përbashkët me ministrinë e drejtësisë për një Gjykatë Apeli, vetëm në Tiranë.

12 gjykata të shkallës së parë dhe vetëm 1 apeli në tiranë është ideja e KLGJ-së për hartën e re gjyqësore, që shikohet si zgjidhje e vetme për funksionimin e sistemit të drejtësisë pas pasojave të vetingut.

Por sipas burimeve ministria e drejtësisë është e idesë për të lënë 3 gjykata apeli nga 6 që janë aktualisht. Euronews Albania iu drejtua zyrtarisht KLGJ-së për një kopje të variantit që po diskutohet por palët duket se janë ende larg.

“Këshilli i Lartë Gjyqësor ka vijuar punën me ministrinë e drejtësisë, ndërsa procesi i konsultimit vijon ende, por nuk ka një dokument përfundimtar, të dakordësuar, i cili më pas përcillet si bashkë propozim, për t’u miratuar nga këshilli i ministrave”, thuhet në dokumentin e KLGJ.

Në daljen e tij të parë për mediat, ministri i ri i Drejtësisë, Ulsi Manja tha se harta e re do të ishte gati javën e dytë të tetorit por ky afat kaloi. Harta e re gjyqësore është kërkuar me ngul edhe nga prokurori i përgjithshëm Olsjan Çela ndërsa avokatët janë kundër 1 gjykatë apeli pasi do të sjellë kosto financiare për qytetarët.