Vaksinim me detyrim për studentët, Gjylameti: Ndoqëm shembullin e Europës. Zhupa: Fushata pa strategji

Deputetja e Partisë Socialiste, Blerina Gjylameti dhe ajo e Partisë Demokratike, Ina Zhupa përballë studentëve Ina Metalija dhe Aldi Shehu, debatuan në RinON mbi Arsimin.

E pyetur lidhur me vendimin e qeverisë për vaksinimin e detyrueshëm për studentët dhe problemet që ka sjellë ky vendim në nisje të vitit të ri akademik, znj. Gjylameti tha se Shqipëria ka ndjekur shembullin e vendeve europiane, ku vaksinimi është bërë me detyrim si mënyra e vetme për të mbrojtur shëndetin.

Teksa ka pranuar se studentët kanë hasur në paqartësi në ditët e para të shkollës, deputeten e PS tha se kjo ka ardhur edhe për shkak të ndikimit negativ të medias.

“Ka pasur një paqartësi nga studentët në ditët e para dhe për shkak të ndikimit të media por duhen dëgjuar ekspertët. Vaksina nuk duhet të jetë një zgjedhje, ajo është një detyrim”, tha deputetja e PS.

Për deputeten e PD, Ina Zhupa qeveria jo vetëm që ka ndjekur një standard të dyfishtë lidhur me vaksinimin e detyruar të studentëve, por nuk ka pasur asnjë strategji në menaxhimin e një vendimi për të cilin studentët sipas saj, nuk patën kohën e duhur për t’u informuar.

“Ditën e parë të universitetit, pas 2 vjet mësim online kemi parë absurdin kur rojet e shkollave kërkonin të dhëna personale të studentëve, duke marrë kompetenca që s’u takojnë. Duhej një bashkëpunim më i mirë mes Ministrisë të Arsimit, asaj të Shëndetësisë dhe Rektoratit përmes një personeli të dedikuar për këtë gjë. Ishte një strategji e çorganizuar e qeverisë. Problemi është tek strategjia, koha dhe mosbesimi që kanë shqiptarët tek Komiteti i Ekspertëve, që është më shumë komitet politik”, tha deputetja e PD.

LEXONI GJITHASHTU: 

• Deputetja e PS-së pranon se ka probleme me cilësinë në universitete
• Mësimi online, deputetet Gjylameti dhe Zhupa ndajnë pikëpamje diametralisht të kundërta