Flokët e shpresës, dhurohen për gratë dhe vajzat me kancer gjiri

Prej pesë vitesh Vera Curakaj po trajton kancerin e gjirit pasi konstatoi diçka të dyshimtë në trupin e saj.

 “Me ndihmën e Zotit dhe të mjekëve po luftoj, jam e operuar po bëj kimio. Familja u mërzit shumë edhe unë, po jo shumë kam forcë,” – u shpreh ajo.

Flokët i kanë rënë për shkak të kimioterapive, por e bija ka zgjedhur të presë të sajat për t’ia dhuruar.

“Po shumë emocione dhe shumë e lumtur, mezi e prisja. Të kenë shpresa, thjesht shpresë,” – tha Diamanta Curakaj, vajza e saj.

Mes dhjetëra grave dhe vajzave që dhuruan prerë flokët ishte edhe Blerta, mamaja e së cilës nuk e fitoi dot betejën.

 “Pavarësisht se ajo nuk e fitoi dot këtë betejë, nuk arritëm dot të siguronim një paruke. Unë jam shumë e lumtur se sot dhurimi i flokëve arrihet në Shqipëri.” – tha Maçi.

Në Shqipëri kanceri i gjirit prek afro 600 gra dhe vajza në vit. Mjekët vazhdimisht bëjnë thirrje për ekzaminime sa më të shpeshta.