Ndalohet përsëri hyrja e boksierëve kosovarë në Serbi

Delegacionit përfaqësueses të Kosovës në boks i është ndaluar hyrja në territorin e Serbisë për herë të tretë të dielën.

Ata ishin nisur drejt Beogradit për të marrë pjesë në Kampionatin Botëror të Boksit, në kategorinë e meshkujve, që zhvillohet në kryeqytetin serb nga 24 tetori deri më 6 nëntor.

Delegacioni i Kosovës, i përbërë nga pesë anëtarë, tentoi të shkonte në Serbi dy herë gjatë të shtunës por nuk u lejuan të hynin në këtë shtet pasi iu është kërkuar prezantimi pa simbole shtetërore, gjë të cilën këta fundit nuk e kanë pranuar.

Federata Ndërkombëtare e Boksit (AIBA) ka reaguar menjëherë mbi ngjarjen.

“AIBA synon të krijojë një ambient miqësor për çdo boksier dhe bota e boksit nuk njeh kufij. Ne besojmë se të gjithë sportistët duhet të kenë një shans të barabartë në garë dhe të paraqesin aftësitë e tyre më të mira në ring. Qëllimi i sportit është të bashkojë njerëzit dhe duhet të jetë i pavarur nga politikat kombëtare”, thuhet në reagim.

Sekretari i përgjithshëm i federatës ka kërkuar që autoritetet serbe të lejojnë boksierët kosovarë që të garojnë me simbole shtetërore.

“AIBA është në kontakt me organizatorë, Federatën Serbe të Boksit në përpjekje për të përmirësuar situatën”.

Në këtë kampionat do të marrin pjesë rreth 650 garues nga 105 shtete. Kosovën në këtë kampionat ishte paraparë që ta përfaqësonin tre boksierë: Bashkim Bajoku, Shpëtim Bajoku dhe Patriot Behrami.