Qeveria fokusohet në rindërtimin e zonave të prekura nga tërmeti

Qeveria e Shqipërisë ka marrë vendime të reja këtë javë, ku në fokus janë rindërtimi i zonave të prekura nga dëmet e shkaktuara nga tërmeti.

Zëvendëskryeministri Arben Ahmetaj në një dalje për mediat ka komunikuar vendimet e reja të qeverisë, ku tha se vendimi i parë lidhet me shkollat e rindërtuara, të cilat i kanë kaluar për administrim dhe mirëmbajtje bashkive.

“Sapo kaloi procesi i kalimit të shkollave në pronësi të bashkive. Jemi duke folur për përfundimin e madh të shkollave të rindërtuara në procesin e rindërtimit që i kalojnë qytetarëve, familjeve, prindërve e bashkive për administrim në vazhdim dhe për mirëmbajtje”, tha Ahmetaj.

Po ashtu ai tha se do të nisë shpërndarja e apartamenteve dhe njësive individuale për familjet e prekura nga tërmeti, ndërsa theksoi se disa kategori do t’i marrim ato direkt.

“Ky muaj do të jetë muaj shumë i rëndësishëm për familjet e dëmtuara nga tërmeti”, tha ai.

Ai bëri të ditur se deri në muajin shtator të vitit të ardhshëm do të shpërndahen të gjitha apartamentet dhe njësitë individuale.