Festa e Verës dhe Gështenjave në Pogradec bashkon turistë nga e gjithë bota

Verë, gështenja, muzikë e mirë dhe mikpritje siç dinë pogradecarët.

Kjo ishte atmosfera e 27 vjetorit të kësaj feste në qytetin liqenor e cila ka bërë bashkë shqiptarë nga të gjitha qytetet për të provuar verën pogradecare dhe gështenjat e pjekura.

“Jam nga Transilavnia. Ky vend është shumë I këndshëm po ashtu edhe atmosfera. Vera qenka shumë e mirë,” – tha një turist.

“Unë jam nga Brazili, është hera e parë që vij këtu, arrita dje. Më pëlqen qyteti i Pogradecit, shumë miqësor. Atmosfera është e bukur më pëlqen po ashtu edhe vera e kuqe,” – u shpreh një tjetër qytetar.

Të mbledhur në sheshin kryesor  të qytetit të pranishmit krahas muzikës qytetare, asaj moderne dhe poezive patën mundësinë të shikonin  të improvizuara edhe qilarët e butet e pogradecarëve të vjetër.

Për Entela Gushon nënkryetare e bashkisë tradita vazhdon tashmë prej 27 vjetësh.

“Ky qytet e ka vërtetë traditë prodhimin e verës dhe gështenjës. Këto kodra të mbuluara me gështenja, këto kodra me vreshtari s’kishin se si të mos harmonizoheshin dhe ne të bënim një festë kaq të bukur si sot,” – u shpreh ajo.

Festa e Verës dhe Gështenjave do të zgjasë për dy ditë ndërsa pjesë të saj ka edhe konkursin për poezitë, pikturat dhe verën e kuqe e të bardhë më të mirë.

LEXONI GJITHASHTU:

• Festivali ballkanik i filmit, për 5 ditë Pogradeci kthehet në kinema
• Çelet me një ekspozitë konkursi i parë mbarëkombëtar i letërsisë satirike-humoristike në Pogradec