Protestë për helmimin nga uji, qytetarët e Krujës ankohen për cilësinë e ujësjellësit të ri

Situata e krijuar me ujin e pijshëm ne Kruje ka bërë që banorët të dalin në protestë para bashkisë. Ata tregojnë se prej një javë nuk kanë ujë në banesat e tyre.

“Është fatkeqësia më e madhe se dikush nuk ka mundësi ta blejë një shishe ujë për të pirë në shtëpi. Kam bërë dush para dy orësh dhe koka ime është e bardhë, se nuk e dimë se çfarë ka uji brenda”, thotë një banor.

Situata me ujin është një problem që banorët e Krujës e kanë pasur që prej vendosjes se ujësjellësit të ri.

Banorët mohojnë të jetë shpërndarë ujë falas për ta gjatë kësaj kohe. Madje janë detyruar ta blejnë ujin, duke u shndërruar në një kosto shtesë për buxhetet e tyre.

“Është bërë depozita e re, neve na erdhi ujë i pistë, me erë të keqe, ne nuk e pinim. Edhe filluam ta blejmë”, thotë një qytetare.

Ata kërkojnë dorëheqjen e kryetarit të bashkisë dhe atij të ujësjellësit.