Rritet çmimi i naftës, drejtuesi i Konfindustria: Nevojitet një ent rregullator për karburantet

Kjo domosdoshmëri vjen në kohën kur vendi po përballet me një krizë të thellë jo vetëm në sektorin e karburanteve, por edhe në atë energjetik.

Në një lidhje të drejtpërdrejtë me Euronews Albania, Gjergj Buxhuku tha se tregu i karburanteve në Shqipëri nuk është treg i lirë, pasi ka mungesë konkurrence. Sipas tij, Autoriteti i Konkurrencës nuk e ka bërë detyrën sç duhet, duke mos ushtruar kontroll në tregun e karburanteve.

“Ka mungesë të theksuar konkurrencë, ka monopole, kartela dhe justifikohen vetëm me rritjen e çmimit në bursa”, u shpreh z. Buxhuku.

Ai tha më tej se rritja e çmimit në bursa në karburante nuk transmetohet menjëherë në tregun shqiptar, ashtu siç pretendohet se ndodh.

Për tregun e naftës, z. Buxhuku tha se është tregu më i madh në Shqipëri, me një rëndësi të lartë në ekonominë shqiptare. E megjithatë, për të nuk ka një ent rregullator.

“Tregu i naftës është tregu më i madh në Shqipëri, me gati 1.5 miliard dollarë qarkullim vjetor dhe nuk ka ent rregullator”, u shpreh Gjergj Buxhuku.

Arsyet për krijimin e entit rregullator për karburantet në vend janë të shumta, mirëpo sipas z. Buxhuku nevojitet vullnet politik. Ai tha se krijimi i këtij enti do të tregojë se sa zbatohet demokracia në vend dhe sa e mbron shteti shqiptar interesin publik.

“Nëse nuk ka vullnet për të rregulluar tregun e karburanteve, tregon se Shqipëria është vend i papërgatitur për të treguar se është vend demokratik”, u shpreh drejtuesi i Konfindustria.

Ai përdori si shembull Maqedoninë e Veriut, ku ka një ent rregullator dhe çmimet e karburantit janë më të lira, pavarësisht se mundësimi i naftës është më i vështirë sesa në Shqipëri.

“RMV që është afër me ne ka ent rregullator për tregun e karburanteve. RMV është më pafavorizuar se Shqipëria, pasi nuk ka as porte dhe as naftë, mirëpo ne paguajmë 30-40% më shtrenjtë sesa qytetarët e Maqedonisë së Veriut”, u shpreh Gjergj Buxhuku.

LEXONI GJITHASHTU:

• Rritet çmimi i naftës, shitet 187 lekë litri