‘Kushtetuesja’ pritet të vendosë brenda 30 ditësh për zgjedhjet e 2019

Ditën e sotme Gjykata Kushtetuese shqyrtoi kërkesën e Shoqatës së Bashkive për zgjedhjet lokale të 30 qershorit 2019.

Vendimi pritet të jepet në 30 ditët e ardhme, ku Kushtetuesja do të shprehet nëse zgjedhjet kanë qenë apo jo anti-kushtetuese.

Ndërkohë, nga kjo gjykatë u kërkua edhe verifikimi i procesit të regjistrimit të partisë “Bindja Demokratike” në zgjedhjet lokale të 2019.

Seanca në Gjykatën Kushtetuese vjen pas opinionit të Komisionit të Venecias, i cili theksoi se Gjykata Kushtetuese nuk mund ta ketë në kompetencën e saj gjykimin si anti-kushtetues apo jo të një proces zgjedhor, por kjo nuk e pengon që të ushtrojë kontroll mbi legjislacionin zgjedhor.

Për opinionin e “Venecias”, përfaqësuesi i Shoqatës së Bashkive, Jordan Daci deklaroi gjatë seancës së sotme se komisioni e ka gabim kur thotë se ‘Kushtetuesja’ nuk e ka këtë kompetencë.

“Komisioni i Venecias ka injoruar gjithë praktikën e Gjykatës së të Drejtave të Njeriut. Referuar ligjit, Gjykata Kushtetuese duhet ta gjykojë çështjen”, tha Daci.

LEXONI GJITHASHTU:

• Gjykata Kushtetuese publikon pyetjet drejtuar Komisionit të Venecias për zgjedhjet vendore të 30 qershorit
• Zgjedhjet lokale, Kushtetuesja sqaron arsyet pse iu drejtua Komisionit të Venecias