Zgjedhjet presidenciale në Nikaragua, të arrestuar kundërshtarët politikë

Presidenti i krahut të majtë të Nikaraguas, Daniel Ortega, është i sigurt se do të fitojë një mandat të katërt, në zgjedhjet që demokracitë perëndimore i kanë cilësuar “të manipuluara”, zgjedhje të cilat nuk ofrojnë asnjë sfidë reale për liderin autokratik.

Kushdo që mund ta rrëzonte Ortegën është në burg. Ortega dhe partia e tij janë në pushtet që nga viti 2007. 

Së fundmi 75-vjeçari emëroi “bashkëpresidente” gruan e tij, Rosario Murillo.

Ndërkohë në Kosta Rika, qindra qytetarë të Nikaraguas që jetojnë në mërgim  protestuan kundër qeverisë së Ortegës, duke e quajtur votimin e së dielës një “cirk elektoral” dhe duke kërkuar lirimin e të burgosurve politikë.

Sekretari amerikan i Shtetit Antony Blinken muajin e kaluar i cilësoi false zgjedhjet  duke akuzuar Ortegën, dhe bashkëshorten e tij se kërkonin një “dinasti autoritare”. Zyrtarët amerikanë thanë se sanksionet e reja mund të ndërmerren ndaj qeverisë së shtetit në Amerikën Qendrore.

Ortega, kundërshton kritikat ndërkombëtare, duke thënë se Nikaragua duhet të luftojë imperialistët dhe se sanksionet nuk do ta mposhtin atë.

LEXONI GJITHASHTU: 

• Inteligjenca amerikane: Ndryshimet klimatike do të rrisin tensionet ndërkombëtare
• DASH raporton në Kongres për personat “non grata”
• Boks në kohë pandemie, në Nikaragua u zhvilluan 8 ndeshje këtë të shtunë