Kryeministri polak sugjeron t’i kërkohen NATO-s bisedime për krizën e emigrantëve

Polonia, Lituania dhe Letonia po konsiderojnë t’i kërkojnë NATO-s që të mbajë bisedime urgjente në mes të një krize migracioni në kufijtë e tyre me Bjellorusinë, tha kryeministri polak.

Duke folur për mediat shtetërore polake, kryeministri Mateusz Morawiecki tha se së bashku me homologët e tij nga dy shtetet baltike, po diskutonin nëse do t’i kërkonin aleancës të zhvillonte bisedime sipas nenit 4 të traktatit ku çdo aleat mund të kërkojë konsultime nëse ndjen se integriteti i tij territorial, pavarësia politike ose siguria kërcënohet.

“Duket se nevojitet gjithnjë e më shumë. Sepse nuk mjafton vetëm të shprehim publikisht shqetësimin tonë, tani nevojiten hapa konkretë dhe angazhim i të gjithë aleancës,” – deklaroi Morawiecki.

Tensionet në kufi dukej se u përshkallëzuan javën e kaluar, me autoritetet polake që postuan video të grupeve të mëdha të emigrantëve në kufirin me Bjellorusinë, duke u përpjekur të kalonin në BE.

Bashkimi Europian thotë se Bjellorusia ka zhvilluar një “luftë hibride” duke lehtësuar aksesin e emigrantëve për muaj të tërë në kufirin e jashtëm të bllokut si hakmarrje për sanksionet ndaj regjimit.

Vendet në kufi janë kundërpërgjigjur duke përforcuar kufijtë e tyre, me shpresën se do të mund të bllokojnë rrugën e sapohapur të migracionit.

LEXONI GJITHASHTU:

• Polonia kërkon ndërhyrjen e diplomatit bjellorus pas ‘provokimit’ në kufi
• Tensione në kufi për emigrantët, Polonia mbyll kufijtë me Bjellorusinë
• Përshkallëzohen tensionet në kufirin Poloni-Bjellorusi