Po infektohen punonjës të institucioneve, kryebashkiakja e Shkodrës thirrje qeverisë: Testim urgjent personave në terren

Kryetarja e Bashkisë së Shkodrës, Voltana Ademi i ka drejtuar sërish një thirrje qeverisë që të nisë me urgjencë testimin e personave, të cilëve për shkak të punës, iu duhet të jenë në terren, që nga policët e deri tek punonjëst e shëndetësisë dhe ata të ushtrisë.

Përmes një statusi në faqen e vet në Facebook, znj. Ademi e bën këtë kërkesë teksa thekson faktin se në Shkodër, COVID-19 vijon të përhapet tek punonjësit e institucioneve.

“Sot, fatkeqësisht, janë regjistruar dy raste të reja të personave të infektuar me COVID-19 në institucionet që Shkodër.

Është një personel i Reanimacionit në Spitalin e Shkodrës dhe një personel i FNSH-së Shkodër.

Përsëris edhe një herë apelin tim publik për marrjen e masave shtesë për shërbimin dhe parandalimin e përhapjes së COVID-19, kërkesë testim me URGJENCË të personave që janë në terren çdo ditë:

Personelin shëndetësor në të gjitha institucionet e nivelet: Policinë e Shkodrës; forcat e ushtrisë; personat që punojnë e veprojnë në territor në asistencë e mbështetje të shtresave më në nevojë.

Është JETIKE që kjo të bëhet sa më shpejt të jetë e mundur sepse COVID-19 po përhapet në institucione të rëndësishme si ato të shëndetit dhe ruajtjes së rendit.

Testimi është e vetmja rrugë për të frenuar përhapjen e COVID-19, bashkë me distancimin fizik e social.

#qendronineshtepi duhet të shoqërohet me testimin në shkallë të gjërë, por edhe me pajisjen me mjete mbrojtëse të personelit shendetësor, policisë, ushtrisë dhe personave që veprojnë në territorin e Shkodrës!”, shkruan znj. Ademi.

Mund të lexoni gjithashtu:

Situata në Shkodër, Voltana Ademi: Shumë familje kanë kërkuar t’u bëhet testi, por nuk kanë marrë përgjigje

Shkodra përballet me COVID-19, Voltana Ademi në Euronews Albania: Vatrat po shtohen në institucione, të rritet numri i testimeve!