Rama paralajmëron bizneset që njoftojnë hapjen për nesër: Jeni në kundërshtim me ligjin, javën tjetër lista e radhës

Kryeminsitri Edi Rama ka paralajmëruar disa biznese joushqimore që kanë lajmëruar hapjen për nesër, se kjo që po bëjnë është e jashtëligjshme.

Kreu i qeverisë sqaron edhe një herë se vetëm ato biznese që janë të publikuara në listën e e-Albania do të lejohet të hapen nesër. Ndërkohë, kryeministri lajmëron për një valë të dytë biznesesh që do të hapen, lista e të cilave do të publikohet javën tjetër.

“Kujdes!

Konstatojmë se ka dyqane joushqimore që lajmërojnë hapje për nesër! Hap i nxituar në kundërshtim me ligjin çdo hapje e pamiratuar nga Ministria e Shëndetësisë.

Bizneset e lejuara, në bazë të urdhërit të ministres së Shëndetësisë për javën e ardhshme (20-26 prill), janë të publikuara në portalin e-Albania, së bashku me protokollet përkatëse të sigurisë shëndetësore.

Hapja e çdo aktiviteti tjetër jashtë asaj liste të miratuar është e kundërligjshme. E-Albania do të ketë gati nga sot në mbrëmje edhe lejen për ushtrim aktiviteti në bazë të listës së miratuar, të cilën çdo biznes duhet ta disponojë nga e marta e tutje për ushtrimin e veprimtarisë së vet.

Ju lutem verifikoni në faqen e e-Albania nëse biznesi juaj mund të hapet nesër.

Duke parë ecurinë e përballjes me armikun e padukshëm, do të vendoset dhe lajmërohet në ditët në vijim hapja e mundshme e një blloku tjetër biznesesh gjatë javës së mëpastajme (27 prill – 3 maj)”, shkruan kreu i qeverisë në Facebook.