Kolonja në telajo, artistët e vegjël pikturojnë fshatrat e zonës

Më tepër se 30 fëmijë nga i gjithë qarku i Korçës prej dy ditësh pikturuan Rehovën, Borovën, Sotirën, Vodicën, Shelegurin, kishat qindra vjeçare natyrën me ngjyrat e fantastike të vjeshtës.

Fëmijët tregojnë emocionet që morën këto ditë.

“Unë jam 18 vjeç, kam pikturuar Kolonjën e bukur, është një vend mjaft piktoresk e më pëlqen shumë ta pikturoj. Po dhe do ndjek shkollën për pikturë. Këtu kemi ardhur disa herë dhe kemi bërë piktura shumë të bukura”, u shpreh një prej fëmijëve.

“Jam 16 vjeç, vij nga Pogradeci dhe kam pikturuar kishën e Rehovës, Shën Gjergjit. Ishte një vend shumë i bukur e piktura mori ngjyra shumë të bukura dhe, me pëlqeu shume. Pogradeci besoj se do nderohet sot me punët tona. Ishte një aktivitet shumë i bukur, jo vetëm foto, por e me miqësi”, tha një tjetër.

“Unë quhem Flavio Cenkolli, jam 12 vjeç dhe vij nga fshati i Maliqit nga Sheqerasi. Këto janë pikturat e mia, kjo është një enë nga muzeu e ky është qilim artizanal”,  tha një tjetër nxënës.

Drejtuesit e institucioneve lokale janë entuziastë për edicionin e tretë të kësaj kolonie artistësh të vegjël, që tashmë po kthehet në një traditë.

Ekspozita me pikturat e duarartëve të vegjël do të qëndrojë e hapur për disa ditë në pallatin e kulturës në Ersekë.