OBSH: Këtë dimër në Evropë mund të vdesin 700 mijë persona nga COVID-19

Organizata Botërore e Shëndetësisë tha të martën se në rast se vazhdon trendi i rritjes së rasteve me COVID-19, gjatë këtij dimri nga kjo sëmundje në Evropë mund të vdesin rreth 700,000 persona.

Duke iu referuar rritjes drastike të rasteve me COVID-19 në kontinentin evropian, OBSH-ja, tha se numri i vdekjeve mund të arrijë deri në 2.2 milionë.

“Vdekjet e raportuara parashikohen të arrijnë mbi 2.2 milion deri në pranverën e vitit të ardhshëm”, shtoi OBSH.

COVID-19 është shkaku kryesor i vdekjeve në të gjithë Evropën si dhe Azinë Qendrore, raportoi OBSH-ja.

Shtimi i rasteve në Evropë po nxitet nga një kombinim i variantit shumë ngjitës Delta, mbulimit të pamjaftueshëm të vaksinimit dhe lehtësimit të masave të tilla si vendosja e maskave dhe distancimi fizik, tha OBSH, raporton agjencia e lajmeve Associated Press.

Sipas të dhënave të OBSH-së, vdekjet e lidhura me coronavirusin u rritën javën e kaluar në afro 4,200 në ditë, duke u dyfishuar nga 2,100 vdekje në ditë sa ishin në fund të shtatorit.

“Situata me COVID-19 në të gjithë Evropën dhe Azinë Qendrore është shumë serioze. Ne përballemi me një dimër sfidues”, tha në një deklaratë drejtori rajonal i OBSH-së për Evropë, Hans Kluge.

Ai bëri thirrje për një qasje “vaksina plus”, që nënkupton respektimin e distancës sociale, përdorimi i maskave dhe larjen e duarve.

OBSH-ja tha se maskat reduktojnë mundësinë e infektimit me COVID-19 deri në 53 për qind sipas një studimi të fundit dhe “mbi 160,000 vdekje mund të parandalohen (deri më 1 mars) nëse arrihet mbulimi i përgjithshëm i maskave prej 95 për qind”.