Caktohet gjyqtarja për ankimimin e Mediut, mbrojtja: Ka konflikt interesi

Gjykata e Lartë ka hedhur shortin për çështjen ndaj Fatmir Mediut. Seanca do shqyrtohet nga gjyqtarja Albana Boksi, e cila është kundërshtuar nga pala mbrojtëse.

Kjo e fundit pretendon se Boksi ka konflikt interesi për shkak se ka shqyrtuar disa kërkesa përgjatë procesit. Burime bëjnë me dije se në rast se gjyqtarja nuk jep dorëheqjen, do kërkojë përjashtimin e saj për shqyrtimin e kësaj çështjeje.

Ish-ministri Fatmir Mediu, përmes avokatit mbrojtës ankimoi vendimin e Apelit të Posaçëm për rihapje të hetimeve ndaj tij lidhur me ngjarjen e Gërdecit në vitin 2008.

Rekursi u depozitua rreth 3 javë më parë nga avokati mbrojtës i tij, Ardian Visha, ku kërkon prishjen e vendimit pasi sipas tij është antikushtetuese, dhe se për këtë çështje është dhënë një herë vendim.

Gjithashtu, sipas avokatit një tjetër argument është se vepra penale për të cilën ish-ministri akuzohet është parashkruar.

Në një intervistë për Euronews Albania disa ditë më parë, ish-ministri i Mbrojtjes në kohën kur ndodhi tragjedia e Gërdecit tha se pret që Gjykata e Lartë të marrë vendim të drejtë për çështjen e “Gërdecit” ndërsa paralajmëroi se në të kundër çështjen mund ta ankimojë në Gjykatën e të Drejtave të Njeriut në Strasburg.

“Sistemi ynë gjyqësor nuk është vetëm deri tek Gjykata e Lartë. Shpresoj që ta vlerësojë siç duhet atë që nuk i vlerësoi siç duhet Gjykata e Apelit. Mund të ketë arsye të tjera, por arsye për të bërë drejtësi nuk ka”, tha z. Mediu për Euronews Albania.

LEXONI GJITHASHTU:

• Fatmir Mediu paralajmëron ankimim në Strasburg për “Gërdecin”
• Bushati e Haxhiu: Reforma në Drejtësi nisi për çështjet si e Mediut
• Fatmir Mediu dorëzon rekursin në Gjykatën e Lartë për ‘Gërdecin’