650 mln euro në arkën e shtetit, sigurohet Eurobondi me interes 3.75%

Shqipëria ka marrë 650 milionë euro borxh në tregjet ndërkombëtare.

Ministrja e Financave Delina Ibrahimaj, tha se qeveria nxitoi për të siguruar Eurobondin brenda këtij viti, për shkak të normës së ulët të interesit, 3.75%.

“Qeveria shqiptare gjykoi të arsyeshme të finalizonte transaksionin me vlerë 650 milionë euro, pasi likuiditeti në këtë moment në tregje është i lartë dhe normat e interesit janë në nivelin më të ulët historik”, tha Ibrahimaj.

Por ku do të shkojnë këto para?

“Eurobondi lidhet me nevoja që qeveria shqiptare ka, për mbështetje në sektorë të tillë si arsimi, shëndetësia, bujqësia. Pra, do të përdoret për reforma madhore”, tregon ministrja.

Ajo flet edhe për ulje graduale të borxhit publik.

“Në fund të vitit 2021 presim borxh 80.2% dhe më pas të vijojë rënia graduale ku do të jetë 1% për çdo vit, por synimet tona janë që të jetë më i ulët”, thotë Ibrahimaj.

Afati i firmosur për shlyerjen e këtij borxhi është 10 vite. Ndërkohë, 4 Eurobondet paraardhës kanë pasur afat kthimi 5 dhe 7 vjet.

LEXONI GJITHASHTU: 

• Presidenti i jep pëlqimin Kuvendit për daljen e Shqipërisë në tregun e Eurobondit
• Eurobondi i pestë, Ibrahimaj: Shqipëria do të marrë deri në 700 milionë euro borxh