Prokuroria bullgare: Kontrabanda e naftës jo shkak i aksidentit, një person rezulton i zhdukur

Prokuroria e Bullgarisë i ka hedhur poshtë supozimet se zjarri në autobusin me shtetas të Maqedonisë së Veriut, i aksidentuar 2 ditë më parë ka ardhur si pasojë e karburantin shtesë.

Nga hetimet rezulton se janë gjetur 3 tuba me mbetje nafte, por nuk kanë qenë të mbushur dhe nuk janë përfshirë nga zjarri.

Zëvendësprokurori i Bullgarisë Borislav Sarafov, tha se nga hetimet rezulton se nuk ka pasur shpërthim në autobus. Sipas tij, shkak i aksidentit dyshohet të jetë një gabim njerëzor i shoferit dhe kushtet jo të përshtatshme në rrugë.

Nga ana tjetër, Prokuroria bullgare tha se janë gjetur 44 trupa të pajetë në autobusin e aksidentuar 2 ditë më parë. Po hetohet çfarë ka ndodhur me personin e 52-të i cili nuk është mes të lënduarve, por as nuk është gjetur trupi.

Në autobusin e “Besa Trans” gjendeshin 52 pasagjerë prej të cilëve 44 mbetën të vdekur.

Autobusi është përfshirë nga flakët menjëherë pas aksidentit dhe pasagjerët e kanë pasur të pamundur të dalin pasi dera kishte prekur parmakun e rrugës.

Mes viktimave janë 12 fëmijë, dy prej të cilëve binjakë që u gjendën të mbledhur nga nëna e tyre në përpjekje për t’i shpëtuar nga flakët.

LEXONI GJITHASHTU:

• Aksidenti në Bullgari, qytetarët pa informacion për fatin e të afërmve
• Autobusi ku vdiqën 45 persona në Bullgari pa leje qarkullimi