Të hënën hapet Rruga e Arbrit, thirrje për kujdes drejtuesve të automjeteve

Të hënën më datë 29 nëntor Rruga e Arbrit do të hapet për qarkullim.

Kryeqyteti tashmë do të lidhet më shpejt me zonën verilindore dhe qarkun e Dibrës përmes aksit prej 70 kilometrash, që përbëhet nga 6 tunele dhe 4 ura.

Burreli, Klosi, Bulqiza dhe Peshkopia nëpërmjet Rrugës së Arbrit do të jenë larg nga kryeqyteti dy orë.

Rruga do të jetë mbi 80 % e kalueshme por menaxheri i projektit ka një thirrje për drejtuesit e automjeteve.

Belinda Balluku, ministre e Infrastrukturës dhe Energjisë thotë se janë duke u kryer punimet e fundit për të qenë gati për datën 29 Nëntor, ndërkohë që punime do të vazhdojnë edhe për hapjes së qarkullimit të automjeteve në këtë aks.

“Kemi marrë të gjitha masat sa i takon sigurisë rrugore, por kërkojmë mirëkuptimin e drejtuesve të automjeteve për të respektuar me rigorozitet sinjalistikën rrugore. Punimet do të vijojnë deri në përfundimin e plot të kësaj vepre, e cila shkurton ndjeshëm distancën mes verilindjes së vendit dhe kryeqytetit”, shprehet ajo.

“Një nga elementët që kemi përfshirë në planin e menaxhimit të trafikut është kufizimi i shpejtësisë, përderisa është një rrugë ku ne kemi punime të tjera. Apeli shkon për drejtuesit e mjeteve,” – u shpreh inxhinieri Mihallaq Spirollari.

Aktualisht punimet për përfundimin e rrugës janë fokusuar në tunelin e Murrizit. Rruga e Arbrit përfundon në Blladë në kufi me Maqedoninë e Veriut.