Izolohen 10 familje në Dibër, Ministria e Mbrojtjes tregon situatën nga moti i keq në vend

Reshjet e dendura të shiut që kanë përfshirë vendin prej dy ditësh kanë krijuar probleme në disa qarqe. Ministria e Mbrojtjes ka paraqitur të dhënat e emergjencave civile që raportojnë probleme në disa qarqe.

Më shqetësuese paraqitet situata në vendin e quajtur Ura e Maqedonasit, bashkia Rrogozhinë, ku lumi Shkumbin ka rritje të prurjeve dhe lumi ka filluar të dalë nga shtrati.

Në aksin rrugor Tamarë- Qafa e Bërdalecit, qarku Shkodër, ka pasur rënie gurësh dhe inerte. Edhe në aksin rrugor Librazhd-Zgosht ka pasur rënie të gurëve në trupin e rrugës.

Në qarkun Dibër, në fshatin Vinjoll, njësia administrative Lis, është dëmtuar Ura e Kaçes, e cila është rrëmbyer nga prurjet e zallit dhe është bërë e pakalueshme. Rreth 10 familje janë të izoluara dhe nuk komunikojnë dot me qendrën e fshatit dhe as me qendrën e njësisë administrative.

Si pasojë e reshjeve që vazhdojnë dhe e prurjeve të mëdha të ujit ka dalje të ujërave të përroit të Gurrës në njësinë administrative Shushicë, në qarkun e Elbasanit dhe dalje të lumit Shkumbin në Malasej, njësia administrative Gjergjan, ku janë nën ujë gati 1 ha toka bujqësore.

Emergjencat civile njoftojnë se probleme janë shfaqur edhe në qarkun e Tiranës, ku si rezultat i reshjeve të shiut ka pasur prezencë uji në rrugën “5 Maji”, ku janë rrezikuar disa banesa.