Bizneset në Kosovë paralajmërojnë protesta kundër masave të reja anti-COVID

Oda e Hotelerisë dhe Turizmit të Kosovës ka kundërshtuar rregullat e reja të vendosura nga Qeveria për parandalimin e përhapjes së coronavirusit.

Drejtuesi i Odës, Hysen Sogojeva tha sot se vendimet e qeverisë Kurti nuk janë konsultuar me biznesin. Ai paralajmëroi protesta për të kundërshtuar zbatimin e tyre.

Nga data 6 dhjetor çdo person që hyn në Kosovë duhet të ketë dëshmitë për vaksinimin, si dhe testin negativ për COVID-19.

Masat e reja të qeverisë ndalojnë veprimtarinë e klubeve të natës, si dhe organizimi i festivaleve e koncerteve.

Sipas masave të reja, ora policore do të mbetet në fuqi nga ora 00:00 deri në 05:00 të mëngjesit, me përjashtim të rasteve emergjente.

Pavarësisht numrit të personave, ndalohet veprimtaria e klubeve të natës, si dhe organizimi i festivaleve, koncerteve., pelegrinazheve, dasmave, fejesave, ahengjeve familjar e shoqërore, ekskursioneve në të gjithë territorin e Kosovës.

Gastronomia lejohet të zhvillojë aktivitetin e saj nga ora 05:00 e mëngjesit deri në orën 23:00. Muzika lejohet vetëm deri në orën 21:30. Shërbimi me porosi lejohet edhe pas orës 23:00.

Ndalohet hyrja në mjetet e transportit pa maskë, në taksi lejohen deri në dy udhëtarë. Aktivitetet kulturore, biblioteka, muzetë, kinematë, teatrot, koncertet e filarmonisë, operës, baletit, orkestrat, ansamblet, qendrat rinore, qendrat e kulturës lejohen duke shfrytëzuar 50 për qind të kapacitetit të hapësirës.