Hapet ekspozita për jetën dhe veprën e Hasan Prishtinës

Ne 100 vjetorin e emërimit të Hasan Prishtinës kryeministër i Shqipërisë, në Prishtinë u hap ekspozita me fotografi e dokumente qe sjellin dritë për veprën dhe figurën e tij.

Ato u shfaqën ne Bibliotekën Kombëtare të Kosovës.

Pasardhësi i Hasan Prishtinës tregoi se shumica e dokumenteve janë të panjohura për publikun.

“Mund të themi se komunikimi dhe përshkrimi i familjes Friedrich Urban në dokumentet në gjuhën gjermane është një nga dokumentet që për lexuesin dhe shikuesin është e njohur pak”, thotë ai.

Historiani dhe drejtuesi i Institutit të Trashëgimisë Kulturore e Shpirtërore të shqiptarëve në Shkup, Skënder Hasani, theksoi se në arkivat e vendeve kryesore të Evropës gjenden dokumente dhe fakte të reja nga jeta e Prishtinës.

“Ne jemi në përgatitje të botimit të dokumenteve nga arkivi i Ministrisë të Punëve të Jashtme të Italisë, të Austrisë, të Londrës dhe ato osmane, që gërshetojnë 3-4 burime të sigurta që argumentojnë dhe dëshmojnë për veprimtarinë e tij të palëkundur për çështjen shqiptare”, tha Hasani.

Kjo ekspozitë, që u realizua nga Institutit për trashëgimi shpirtërore e kulturore të shqiptarëve në Shkup në bashkëpunim me Arkivat Shtetërore të Shqipërisë, përveç Prishtinës u mbajt edhe në Shkup, ndërsa gjatë javës do të hapet edhe në Tiranë.