‘Çdo qëndresë për të mos u evakuuar është kosto’, kryebashkiaku i Vlorës thirrje për kujdes nga moti i keq

Drejtori i Emergjencave Civile Haki Çako tha se është momenti që ujërat kanë arritur pikën kritike. Ai u shpreh se po punohet me përforcimin e pjesës së argjinaturës që ka bërë të mundur mosdeportimin e ujit në Novoselë.

“Sigurisht ka pasur që dje evakuim të banorëve, janë njoftuar që në orët e para të ditës nëpërmjet kryepleqve dhe administratorit të territorit,” – deklaroi Dritan Leli, kryebashkiaku i Vlorës.

Sipas tij është një kokfortësi e çuditshme e banorëve të zonës që nuk pranojnë të largohen.

Leli nënvizoi se Vjosa është në ato nivele kritike që ai vetë nuk e ka parë ndonjëherë, duke qenë se ka kaluar mbi urën e vjetër prej prurjeve të mëdha të ujërave.

“Çdo qëndresë është në koston e tyre dhe tonën sigurisht,” – pohoi kryetari i Bashkisë Vlorë ndërsa bëri thirrje që banorët të kujdesen për jetën e tyre dhe të bagëtive.

Kushtet e motit kanë përkeqësuar gjithashtu kushtet e qarkullimit rrugor, por Autoriteti Rrugor Shqiptar ka lajmëruar se në jug dhe në rajonin qendror reshjet kanë pushuar.

Ndërkohë po punohet për pastrimin e rrugëve dhe për hedhjen e kripës në ato segmente ku ka prezencë të borës.