Hiqet detyrimi i kontrollit fizik për automjetet kur ndërron pronësia

Automjetet nuk do t’i nënshtrohen më kontrollit fizik kur ndërrohet pronësia.

Lajmi është bërë me dije nga kryeministri Edi Rama, i cili përmes një postimi në Facebook bën me dije se ‘me marrjen në administrim shtetëror të Kontrollit Teknik që ishte dhënë me një koncesion, Certifikata e Kontrollit Teknik të DPSHTRR heq përfundimisht detyrimin e kontrollit fizik të automjetit kur ndërron pronësia’.

“Eliminohen 60 mijë kontrolle fizike të automjeteve në vit. U kursehen qytetarëve 90.000.000 lekë dhe 30.000 orë pritje në vit”, shkruan kryeministri Rama në Facebook.

Prej 1 janarit, shërbimi i kontrollit teknik të makinave, i njohur ndryshe si kolaudimi, do të mundësohet nga Drejtoria e Përgjithshme e Shërbimeve të Transportit Rrugor (DPSHTRR) dhe jo më nga koncesionari, të cilit i përfundon kontrata.

Në një intervistë për Euronews Albania disa javë më parë, drejtori i DPSHTRR-së, Blendi Gonxhe komentoi zhvillimin e fundit duke shtuar se tashmë është vendosur që kolaudimi të mos bëhet më periodikisht çdo vit, por një herë në dy vite.

Pas përfundimit të koncesionit pothuajse 10-vjeçar të kolaudimit, autoritetet publike përfitojnë investimet e kryera nga privatët, si kapanonet, logjistika apo dhe sistemi elektronik i rezervimeve.

LEXONI GJITHASHTU:

• Kolaudimi i makinave i kthehet shtetit, Blendi Gonxhe: Kontrolli një herë në dy vite
• Kolaudimi i automjeteve njëherë në dy vjet kërkon ndryshimin e Kodit Rrugor