Efektet e heqjes së taksës 100%, për një muaj Kosova ka importuar mbi 12 milionë euro nga Serbia

Një muaj pas heqjes së taksës 100% nga Qeveria Kurti, Dogana e Kosovës thotë se mbi 12 milionë euro ka pasur import nga Serbia, ndërsa rreth 1 milion euro janë mbledhur taksa nga importi i mallrave. 

Sipas doganës, Serbia ka pranuar maunet kosovare me vula doganore të Doganës së Kosovës. Këto shifra vijnë pas vendosjes së reciprocitetit të pjesshëm, ku Dogana e Kosovës ka publikuar raportin përmbledhës për periudhën 01-26 prill 2020. 

Në njoftim thuhet se Dogana e Kosovës, përveç faktit që ka bërë plotësimet dhe ndryshimet e nevojshme në sistemin e saj konform vendimit të Qeverisë, të cilat ndërlidhen me dokumentet dhe certifikatat higjieno-sanitare dhe atyre veterinare, gjatë zbatimit të tij i ka kushtuar rëndësi të veçantë kontrollit të dokumentacionit doganor që përcjellin mallrat me qëllim të sigurimit që emërtimet e përdorura të jenë në përputhje me Kushtetutën e Republikës së Kosovës.