Shtrenjtohet çmimi i energjisë elektrike në Kosovë

Në Kosovë është shtrenjtuar çmimi i energjisë elektrike për konsumatorët që shpenzojnë mbi 800 kilovat në orë. Zyra e Rregullatorit për Energji (ZRRE) në Kosovë miratoi sot tarifat e reja.

Konsumatorët e tarifës mbi 800 kilovat në orë do të kenë tarifën e lartë prej 12.5 cent për kilovat dhe 5.9 cent për tarifën e ulët.

Për konsumatorët që shpenzojnë deri në 800 kilovat në orë, tarifa e lartë do të jetë 7 cent, ndërsa ajo e ulët, 3 cent.

Nga data 1 tetor deri më 31 mars, në Kosovë aplikohet tarifa e ulët e rrymës, prej orës 22:00 deri në 07:00.

Ndërsa, nga data 1 prill deri më 30 shtator, tarifa e ulët vlen nga ora 23:00 deri në 08:00.

Fillimisht ZRRE kishte propozuar rritje për konsumatorët që shpenzojnë mbi 600 kilovat në orë.

Zyrtarë të këtij institucioni kanë përmendur se pas propozimit fillestar kanë marrë komente si asnjëherë më parë nga konsumatorët dhe organizata tjera.

“Të gjithë konsumatorët komercialë dhe konsumatorët shtëpiakë që shpenzojnë deri në 800 kilovat në orë do të kenë zero rritje”, është thënë në takim, duke përmendur se rreth 20 për qind e konsumatorëve e tejkalojnë këtë konsum.

Sipas ZRRE-së, bllok-tarifa nuk është diskriminuese pasi “zbatohet njëtrajtësisht për të gjithë konsumatorët”.

Për të lehtësuar barrën e qytetarëve nga rritja e çmimit të energjisë, Qeveria e Kosovës ka ndarë një shumë prej 90 milionë eurosh në formë subvencionimi. Subvencionet e Qeverisë do të shfrytëzohen për një periudhë njëvjeçare.

Muajve të fundit, Kosova është futur në krizë energjetike, si pasojë e krizës që ka përfshirë Evropën.

LEXONI GJITHASHTU: 

• Energjia elektrike në Kosovë do të kushtojë 9% më shtrenjtë
• Në Kosovë protestohet kundër shtrenjtimit të energjisë