$9 milionë nga Zoto i inceneratorëve për një çift në Rubik, denoncon Kryemadhi

Kryetarja e Lëvizjes Socialiste për Integrim, Monika Kryemadhi thotë se në tenderët e inceneratorëve ka abuzime të mëdha, duke denoncuar rastin e një çifti nga Rubiku.

Kompania e quajtur AM Co&Co është krijuar nga Monika dhe Arben Përlala që sipas znj. Kryemadhi janë paguar nga Klodian Zoto me 9 milionë dollarë, pa specifikuar për punimet e cilit incenerator bëhet fjalë.

Pagesa është bërë për të kryer punime për inceneratorët dhe sipas kryetares së LSI, kompania nuk ekziston e regjistruar si biznes.

“Një çifti që jetojnë në Rubik, me shtëpi me qira në Lezhë, Klodian Zoto i ka dhënë 9 milionë dollarë punë. Këta nuk bëjnë asgjë, a janë lavazhierë, a janë fermerë, nuk ekzistojnë asgjëkund”, thotë ajo.

Kryemadhi shprehet se e njëjta skemë është përdorur për të tre inceneratorët, ku janë paguar kompani fantazmë, të cilët nuk i kanë paguar shtetit as TVSH.

Akuza për abuzim me paratë publike, Kryemadhi bëri për të tre inceneratorët, duke thënë se është kapur në flagrancë kryeministri, Edi Rama dhe kreu i Bashkisë së Tiranës, Erion Veliaj.

Kryetarja e LSI tha se drejtësia nuk vepron pasi “SPAK mbahet peng për të mos vepruar”.

Sipas saj skema e vjedhjes dhe pastrimit të parave është ngritur nga kryeministri Edi Rama.

Kryetarja e LSI tha se për inceneratorët janë paguar 130 milionë euro ndërsa tatim mbi vlerën e shtuar nuk është paguar asnjë qindarkë.