COVID-19, Britania kalon Italinë, me mbi 30 mijë të vdekur

Britania u bë vendi i parë në Europë me më shumë se 30 mijë të vdekur nga COVID-19, duke kaluar Italinë dhe duke u renditur e dyta në botë, pas SHBA-ve.

Profesori Neil Ferguson, i cili është angazhuar shumë me strategjinë e vendit për të luftuar virusin, dha dorëheqjen pasi i kishte shkelur vetë rregullat e distancimin social.

Si këshilltar i kryeministrit, ai tha se vdekjet mund të shkonin deri në 250 mijë, po të mos merreshin masa kufizuese ekstreme.

Por një lajm nga “Daily Telegraph” tregoi se si ai u vizitua nga një grua në shtëpi, një grua e martuar me të cilën kishte lidhje dashurie, gjatë kohës që duhej të ishte i izoluar, duke shkelur kështu rregullat.

Në SHBA, ku numri i të vdekurve ka shkuar në 71 mijë, presidenti Trump tha se vendi është gati që të rihapë bizneset.

Veç kësaj, Trump u pa duke vizituar një fabrikë maskash në Arizona, por vetë nuk kishte vënë maskë në fytyrë, duke shpërfillur rregullat, bashkë me anëtarët e tjerë të stafit të Shtëpisë së Bardhë.