Miliona euro për inceneratorin e Fierit që ende nuk punon, denoncon PD

Dy deputetë të Partisë Demokratike, pjesë e Komisionit Hetimor për Inceneratorët, kanë vizituar inceneratorin e Fierit ku denoncuan faktin se është ende jashtë funksioni pavarësisht se janë paguar miliona euro.

Dhurata Çupi dhe Lefter Gështenja ishin në impiantin e përpunimit të mbetjeve si pjesë e komisionit hetimor, ku priten të thirren për t’u marrë në pyetje zyrtarë të lartë, mes të cilëve kryeministri Rama.

“Objekti nuk punon, nuk është funksional. Nuk ka mbetje që përpunohen. Depozita është bosh”, tha  Çupi.

Për inceneratorin e Fierit, koncesioni u dha në vitin 2016. Integrated Technology bëri ofertë të pa kërkuar.

Qeveria shpalli garën ku mori pjesë vetëm kjo kompani, e cila fitoi kontratën me vlerë 25 milionë euro.

Kontrata fillestare parashikonte përfundimin e punimeve për 2 vjet ndërsa kontrata përfundimtare i zgjati punimet në 6 vjet.

Pagesat për kompaninë e inceneratorit të Fierit kanë filluar në nëntor 2016 dhe deri më tani janë paguar mbi 30 milionë euro.

Gjatë vitit 2022, viti i fundit i punimeve sipas kontratës, parashikohet të paguhen edhe 5 milionë euro të tjera.