Greqia hap sezonin turistik

Greqia do të hapë sezonin turistik më herët se në vitet e mëparshme, pas sinjaleve pozitive të rimëkëmbjes para sezonit veror.

Pasi pandemia e COVID-19 çoi në kufizimin e udhëtimeve në rang global në vitin 2020, turizmi grek përjetoi një prej viteve më të këqija, me vetëm 7 milionë vizitorë, që i sollën vendit vetëm 4 miliardë euro të ardhura.

Industria e turizmit, që përbën një të pestën e ekonomisë helene dhe krijon një vend pune në 5, filloi të rikuperohet vitin e kaluar, kur sezoni që nisi në muajin maj solli 10.5 miliardë euro fitime, që gjithsesi ishin më pak se rekordi i regjistruar në vitin 2019, plot 18 miliardë euro.

“Greqia është e hapur për të gjithë nga dita e sotme, por sezoni i vërtetë, ai aktual, do të nisë në fillimet e marsit, më 1 mars. Përse po e bëjmë këtë? Sepse ka një kërkesë në rritje për turizmin grek në 2022-shin”, tha Vassilis Kikilias, ministër i Turizmit, Greqi.

Ministri bëri gjithashtu me dije se, operatorët e mëdhenj turistikë synojnë ta zgjasin periudhën e sezonit nga marsi deri në dhjetor.

Një fillim i mëhershëm i sezonit do të thotë se hotelet që mbyllen gjatë muajve të dimrit mund të rihapen më shpejt dhe operatorët turistikë të nisin sjelljen e turistëve.

Agjencitë e kreditimit vlerësojnë se turizmi do të ndihmojë ekonominë greke të rritet me 4.5 deri në 5 për qind dhe që sektori të arrijë 80 deri në 90 për qind të rekordit të vitit 2019, kur vendi u vizitua nga 33 milionë turistë.

LEXONI GJITHASHTU: 

• Greqia lehtëson masat për udhëtarët