Gjykata lë në qeli kamerunasin që u kap me 1 mln euro false

Afrikani që tentoi të fuste në Shqipëri mbi 1 milion euro të falsifikuara do të qëndroje në burg. Gjykata e Tiranës caktoi masën e sigurisë arrest me burg për Josoue Ngankam.

Për këtë rast në seancë u paraqit edhe një përkthyese e certifikuar nga ministria e drejtësisë.

53-vjeçari nga Kameruni, por me leje qëndrimi në Francë u ndalua të mërkurën në aeroportin e Rinasit. Në valixhen e rrobave iu gjetën 1 milion e 75 mijë euro të falsifikuara.

Për të mbërritur në Shqipëri, afrikani kishte ndjekur itinerarin Lyon-Stamboll-Rinas.

Kontrolli i detajuar zbuloi se në valixhe kishte fshehur edhe letra të tjera dhe pajisje për përgatitjen e kartmonedhave.

Hetimi zbuloi se Ngankam kishte qenë në Shqipëri edhe më herët.

Kamerunasi ka mbërritur në Rinas edhe në 7 janar të këtij viti për të dalë nga Shqipëria më 12 janar me destinacion Varshavën në Poloni.

Hetuesit po verifikojnë çdo të dhënë pasi dyshojnë se 53-vjeçari ka bashkëpunëtorë në Shqipëri.

Në deklarimet e tij kamerunasi është shprehur se valixhen ja ka dhënë një bashkëkombas i tij me emrin Toni.

Policia ka parë kamerat e sigurisë së aeroportit “Nënë Tereza”, por pa mundur të identifikojë ndonjë person që e priste.

Edhe gjatë pyetjes në komisariat Kamerunasi ka qenë kontradiktor duke dhënë disa versione.

Kjo është një nga sasitë më të mëdha të parave false të  kapura në Rinas.