Drejtoresha e Teatrit në Rusi jep dorëheqjen: Nuk punoj për një vrasës

Drejtoresha e Teatrit Shtetëror në Moskë, Elena Kovalskaya, dha dorëheqjen pas sulmeve ruse në Ukrainë, dhe e quajti Putinin “vrasës”.

Elena Kovalskaya la postin e saj të enjten, ditën kur presidenti rus filloi sulmet vdekjeprurëse në të gjithë territorin e Ukrainës, për të vijuar edhe të nesërmen.

“Është e pamundur të punosh për një vrasës, e të paguhesh prej tij. Në shenjë protestë kundër pushtimit rus të Ukrainës, po jap dorëheqjen”, shkroi Kovalskaya në faqen e saj në Facebook.

Ajo njoftoi se projektet në Teatrin Shtetëror do t’i çojë deri në fund, në mënyrë vullnetare, pa marrë pagesë nga shteti, president i të cilit është Vladimir Putini.

Kovalskaya nuk u ndal me kaq, ajo u bëri thirrje të gjithë rusëve që t’i thonë “Jo” luftës, e të mos heshtin.

Kovalskaya është kritike arti dhe mësuese e historisë së teatrit botëror.

Ajo u bë drejtoreshë e Meyerhold Theatre and Cultural Center në vitin 2021. Ky teatër i ka ndaluar aktorët të bëjnë komente për pushtimin rus të Ukrainës.

Por veprimi i Kovalskayas për të dhënë dorëheqjen u mbështet nga qytetarët rusë, dhe bëri bujë në mediat botërore.

Me mijëra qytetarë protestuan në Rusi kundër pushtimit të Ukrainës të enjten, ku të paktën 735 u arrestuan.

“Jo luftës me Ukrainën, Putin të japë dorëheqjen”, shkruhej në pankartat e protestuesve.

Rusia i nisi sulmet ndaj Ukrainës mëngjesin e të enjtes, duke përparuar në të gjithë territorit për t’iu afruar Kievit, të premten.

Të paktën 137 njerëz kanë vdekur nga luftimet, dhe 316 janë plagosur.

Perëndimi ka vendosur sanksione të ashpra ndaj Rusisë, por duket se kjo nuk po e ndal Putinin, i cili vazhdon bombardimet në Ukrainë.