Sekuestrimi i 1 mln eurove, Euronews Albania tregon si prodhohen paratë false

Euronews Albania ka siguruar pamjen e pajisjes së sofistikuar që dyshohet të ketë prodhuar paratë false që u kapën në Rinas javën e kaluar.

Agjentët e krimit ekonomiko-financiar arrestuan në Tiranë edhe shtetasen zvicerane Jeniffer Chollet.

39-vjeçarja dhe kamerunasi Zinedine Nkeh, i ndaluar të enjten dyshohet se janë dy bashkëpunëtorët e Josoua Ngankam, për të cilin Gjykata e Tiranës ka caktuar masën arrest me burg.

Në banesën ku qëndronte zvicerania policia gjeti sërish lastra dhe kimikate të cilat bënin të mundur pastrimin e defekteve të kartëmonedhave të falsifikuara.

Zinedine Nkeh, nga ana tjetër mësohet se është personi i cili do të priste paratë.

Ai i kishte dhënë kamerunasit tjetër një adresë hoteli në zonën e Laprakës që do të shërbente si vendtakimi për dorëzimin e valixhes.

Përmes oficerit të kontaktit, edhe autoritetet franceze kanë nisur hetimet me dyshimet se pas eurove false fshihet një grup më i gjerë falsifikatorësh.

Sipas dosjes hetimore që siguron Euronews Albania, shtetasi kamerunas Josoue Ngankam ka deklaruar se valixhen ku u gjetën eurot false ja kishte dhënë në Paris një shtetas me emrin Toni, ende i paidentifikuar.

LEXONI GJITHASHTU:

• Gjykata lë në qeli kamerunasin që u kap me 1 mln euro false
• Kapet kamerunasi me mbi 1 milion euro të falsifikuara në Rinas