Emocionet njerëzore në “Infektiv”, Esmeralda Meta: Jemi bërë të afërm për të sëmurët

Ministria e Shëndetësisë njoftoi sot se janë konfirmuar vetëm katër raste të reja me COVID-19, ndërsa ky tregues shihet me pozitivitet nga vetë mjekët. Mjekja infeksioniste, Esmeralda Meta theksoi në “Ilva Now” se qytetarët duhet të respektojnë masat e distancimit social, pa anashkaluar përdorimin e maskave dhe doreza  në vende ku ka grumbullime masive.

“Është e vërtetë se vihet re një ulje e rasteve. Këto janë nota pozitive për ne. Hapja  graduale që po bëhet influencon në parashikimet tona, do rritet apo do kemi raste të reja, kjo do të shihet në ditët në vijim. Ne vendet ku bëhet pazar, duhet të jemi të kujdesshëm dhe qytetarët të bëjnë kujdes pasi viroza nuk është zhdukur”, tha ajo.

Mjekja tregoi detaje për gjendjen e pacientëve të shtruar në Spitalin Infektiv në QSUT, por edhe ndjesitë, të cilat i kanë përjetuar doktorët gjatë trajtimit të të sëmurëve me COVID-19.

“Kemi të shtruar, numri është më i pakët në krahasim me javën e shkuar. Të shtruarit janë në gjendje shëndetësore të mesme, por ka edhe ata që janë në gjendje të rëndë. Ne ishim mjekë dhe të afërm për këta të sëmurë”, tha ajo.