Kosta Rikë, sekuestrohet 1 ton kokainë; droga me destinacion Roterdamin

Policia e Kosta Rikës sekuestroi në 24 orët e fundit mbi 1 ton kokainë të pastër, të fshehur në një kontejner që po transportonte lëng ananasi.

Lënda narkotike, sipas autoriteteve lokale, kishte si destinacion qytetin e Roterdamit, në Holandë, ku e hedhur në treg do të sillte miliona euro fitime.

Ministri i Kosta Rikës për Sigurinë Publike, Majkëll Soto sqaroi se oficerët e anti-drogës po e mbikëqyrnin ngarkesën dhe më pas e ndaluan atë.

Bëhet fjalë për ngarkesën e tretë të madhe të drogës që autoritetet sekuestrojnë në 6 muaj. Më 15 shkurt, ato zbuluan 6 tonë kokainë të fshehur në një kontejner, që kishte gjithashtu destinacion Roterdamin.