Bardhi: I kam kërkuar Bashës të tërhiqet bashkë me Berishën

Sekretari i Përgjithshëm i Partisë Demokratike, Gazment Bardhi në përfundim të mbledhjes së grupit parlamentar tha se zgjidhja e vetme për krizën është bashkimi i PD.

Sipas tij, largimi i Bashës dhe Berishës nga drejtimi i partisë është zgjidhja, pasi të dy liderët shihen si problem për PD-në.

“I kam kërkuar që të tërhiqet së bashku me shkaktarin tjetër, Berishën. Duhet të gjejmë një zgjidhje përtej dy individëve që e kanë shkaktuar këtë problem. Sado ka një problematikë të shkaktuar nga dy individë duhet të dy të tërhiqen”, tha Bardhi.

Sekretari i Përgjithshëm i PD shtoi se ‘vetëm të bashkuar mund të fitojmë, nëse vijojmë luftën të përçarë do jetë e pamundur që të jemi fitues’. Sipas tij Basha është shprehur i gatshëm për ‘të bërë një hap pas’.