Serbët në Kosovë të marrin pjesë në zgjedhje, thotë Chollet

Është e rëndësishme që qytetarëve serbë që jetojnë në Kosovë të mund të marrin pjesë në zgjedhjet parlamentare të Serbisë më 3 prill.

Kështu u shpreh këshilltari në Departamentin Amerikan të Shtetit, Derek Chollet pas një bisede telefonike me kryeministrin e Kosovës, Albin Kurti.

“Zhvillova një bisedë të mirë me kryeministrin e Kosovës Albin Kurti sot. E falënderova atë për mbështetjen e fortë ndaj Ukrainës dhe theksova rëndësinë që qytetarët me të drejtë vote në Kosovë që të mund të marrin pjesë në zgjedhjet e ardhshme kombëtare të Serbisë më 3 prilli”, ka shkruar Chollet në Twitter.

Had a good conversation with Kosovo Prime Minister @albinkurti today. Thanked him for his strong support on Ukraine and stressed the importance of ensuring eligible voters in Kosovo are able to participate in the upcoming April 3 Serbian national elections.

— Derek Chollet (@CounselorDOS) March 14, 2022

Më 19 shkurt, institucionet e Kosovës nuk e kanë lejuar mbajtjen e referendumit serb për disa ndryshime kushtetuese, sipas kërkesës së Beogradit. Qeveria e Kosovës ka thënë se serbët që jetojnë në Kosovë dhe që kanë të drejtë vote në Serbi mund të votojnë me postë ose përmes zyrës ndërlidhëse për këtë referendum.

Sa i përket zgjedhjeve të 3 prillit, Kosova do ta shqyrtonte mundësinë e mbajtjes së zgjedhjeve parlamentare dhe presidenciale serbe, nëse Beogradi zyrtar i dërgon kërkesë Qeverisë së Kosovës, tha të hënën shefja e Grupit Parlamentar të Lëvizjes Vetëvendosje, Mimoza Kusari-Lila.

“Përgjigja e institucioneve të Kosovës, tashmë e konfirmuar edhe në nivel të legjislativit, është që vetëm në një pranim të kërkesës zyrtare nga shteti i Serbisë drejtuar shtetit të Kosovës me kërkesë bazuar në ligjet e aplikueshme të Kosovës dhe në praktikat evropiane, do të shqyrtohej ajo kërkesë dhe do të merrej vendimi për apo kundër mbajtjes së zgjedhjeve”, tha Kusari-Lila pas mbledhjes së Kryesisë së Kuvendit.

Ajo shtoi se deri më tani nuk ka ndonjë kërkesë zyrtare nga Serbia drejtuar institucioneve të Kosovës.

Sipas saj, Beogradi i është drejtuar institucioneve ndërkombëtare për mundësinë e mbajtjes së zgjedhjeve, por Kusari-Lila tha se “në Kosovë autoriteti sovran është Qeveria e Kosovës dhe institucionet e Kosovës”.

LEXONI GJITHASHTU: 

• Partitë shqiptare në Preshevë të përçara para zgjedhjeve të 3 prillit