Presidenti i Këshillit Evropian Donald Tusk viziton Tiranën

Presidenti i Këshillit Evropian Donald Tusk do të vizitojë të martën Tiranën, një muaj përpara marrjes së një vendimi në lidhje me çeljen e negociatave të anëtarësimit nga Bashkimi Evropian.

Gjatë vizitës disa orëshe në Tiranë, Tusk pritet të takojë kryeministrin Edi Rama dhe figura të tjera të politikës në vend.

Pas përmbylljes së takimeve, Tusk do të udhëtojë drejt Maqedonisë së Veriut për tu takuar me liderët vendas.

Disa prej temave të këtyre takimeve kanë të bëjnë me çështjen e hapjes së negociatave të anëtarësimit nga ana e Bashkimit Evropian, një vendimarrje që pritet të bëhet në 18 Tetor.

Më herët në Qershor, Tusk u shpreh se ai rekomandonte çeljen e negociatave me Shqipërinë e Maqedoninë e Veriut, megjithatë, sipas tij jo të gjitha vendet anëtare ndajnë të njëjtin mendim.

Pavarësisht skepticizmit në mesin e vendeve anëtare të bllokut, Tusk sqaroi se nuk ka dyshime mbi hapjen e negociatave. “Çështja nuk është a do të ndodhë, por kur do të ndodhë,” tha Tusk në një intervistë më herët në Qershor.

Vizita e Tusk në Tiranë vjen pak ditë pas takimit të kryeministrit Edi Rama me kancelaren gjermane Angela Merkel në Berlin. Sipas Ramës, mbështetja e Gjermanisë për integrimin e Shqipërisë në Bashkimin Evropian është e fortë dhe shumë e rëndësishme.

Megjithatë, rekomandimi për çeljen e negociatave të anëtarësimit me Shqipërinë dhe Maqedoninë  e Veriut që pritet të bëhet me 18 Tetor, ka nevojë për votën e të gjithë vendeve anëtare të bllokut.