‘Rama ka ndërtuar sistem skllavërie moderne’, thotë Basha

Ish-kreu i Partisë Demokratike, Lulzim Basha e ka cilësuar ‘thërrime’ paketën e ndihmës që shumica qeverisëse pritet të miratojë sot në Parlament.

Basha duke folur për mediat jashtë sallës tha se ‘shpenzimet luksoze qeveritare duhen ndërprerë dhe paratë të shkojnë për familjet në nevojë’.

“E gjitha kjo që po ndodh sot, është një thërrime, nga një sofër e shtruar me luks për një grup qeveritarësh”, tha Basha duke iu referuar planit të mbështetjes për krizën.

Ish-lideri i PD akuzoi se kryeministri Rama ka ndërtuar gjatë qeverisjes së tij një ‘sistem skllavërie moderne’.

“Shtresa e mesme është vënë në presionin e taksave dhe në presionin e gjithanshëm për të mosmarrë atë që duhet të marrë nga puna e vet, por mjaftueshëm që të mos lërë punën dhe çdokush poshtë shtresës së mesme lufton për mbijetesë dhe nuk ka alternativë tjetër përveçse të largohet nga vendi”, deklaroi Basha.

Hetimet e fundit të SPAK për inceneratorin e Fierit, ish-kreu i PD i cilësoi si një hetim të pjesshëm duke thënë se ‘koka e aferës është  Rama dhe ministrat e tij’.

“Nuk bëhet fjalë për dënim individësh por për vjedhje të taksave të shqiptarëve”, tha ai.