Meta: Ajo që ndodhi me teatrin nuk do të amnistohet, kauza vazhdon deri në shembjen e tiranisë

Presidenti Ilir Meta paralajmëroi të martën se shembja e Teatrit Kombëtar nuk do të amnistohet dhe se kauza e saj do të vazhdojë “deri në shembjen e tiranisë dhe rindërtimin e teatrit”.

Përmes një postimi në Facebook, Meta tha se “më 17 maj ndërgjegjja shoqërore dhe kombëtare u lëndua si kurrë më parë”.

“Maska e tiranisë ra përpara të gjithë shqiptarëve dhe e gjithë bota e vërtetë demokratike u shokua. Kurrë një ngjarje nga Shqipëria s’do prodhonte një jehonë të tillë dhe negative, që nuk shlyhet më dhe as harrohet derisa mbi rrënojat e 17 majit të vendoset drejtësia,” – u shpreh Meta.

Presidenti, i pozicionuar qartësisht kundër procedurave të ndjekura nga qeveria dhe Bashkia Tiranë, e cilësoi protestën e Aleancës për Mbrojtjen e Teatrit Kombëtar si “fitore” dhe jo “humbje”.

Sipas Metës kjo protestë zgjoi dhe bëri bashkë qytetarët përballë tiranisë.

“Një popull që fle në demokraci zgjohet në diktaturë. Tani kauza e tyre është e të gjithëve ne, dhe nuk do të ndalojë deri në shembjen e Tiranisë dhe Rindërtimin e Teatrit. Mirënjohje të përjetshme artistëve të cilët zgjuan qytetarinë,” – u shpreh Meta.

Qëndrimin e radhës, Meta e mbajti duke shpërndarë një përmbledhje të disa prej zhvillimeve nga aktivistët e Aleancës.

Lexoni gjithashtu:

Varhelyi: Nuk mund t’i tregojmë një vendi si duhet të jetë teatri

Rama: Dakordësi për të çuar përpara reformën zgjedhore, shpifësit prodhuan kështjellë balte për teatrin

Basha i përgjigjet Kryeministrit: Je peng i oligarkëve, punon vetëm për ta

Takimi i Yuri Kim me kryeminstrin Rama, zbardhen çështjet që u diskutuan