Presidenti Meta mesazh të koduar politikës: Muret i shembën, por shpirtrat jo!

Presidenti i Republikës, Ilir Meta, gjatë vizitës në Shkodër për nder të Natës së Kadrit ka marrë një dhuratë të veçantë nga myftiu i qytetit Muhamed Sytari.

Me një shënim në faqen e tij zyrtare në “Facebook”, kreu i shtetit duke cituar fjalët e myftiut ka përcjellë një mesazh të koduar politikës shqiptare. 

Presidenti Meta ka dënuar me ashpërsi prishjen e godinës së Teatrit Kombëtar, ndërsa këtë veprim e ka krahasuar me aksionin e regjimit të komunizmit në 1967, i cili shembi objektet fetare në Shqipëri.

“Shumë i lumtur që në këtë vit jubilar të 30-vjetorit të rikthimit të lirisë fetare, të merrja dje dhuratë një foto nga rihapja në 16 nëntor 1990, të Xhamisë së Plumbit në Shkodër. 2169 faltore, pjesë e trashëgimisë kulturore dhe historike të vendit u shkatërruan nga barbaria e diktaturës komuniste. Dhjetra klerikë u martirizuan, u burgosën dhe u internuan. Por siç me të drejtë thotë edhe Myftiu i Shkodrës, Imam Muhamed B. Sytari: “Gurët dhe muret i shembën, por shpirtrat jo”.”, shkruan Meta.