Të dënuarit në burgun e Reçit, mundësi për t’u punësuar

Të burgosurit në burgun e Reçit do të kenë një mundësi të re punësimi brenda ambienteve të burgut. Kjo falë bashkëpunimit të ministrisë së drejtësisë me firma private.

60 të dënuar në burgun e Reçit do të kenë mundësinë të punësohen në fasoneri. Nisma e ndërmarrë nga ministria e drejtësisë, parashikon realizimin e produkteve, duke punuar në ambientet e burgut dhe duke përfituar në fund të muajit pagesën minimale të miratuar nga ministria financave.

Ky lajm u prit mjaft mirë nga të burgosurit të cilët në këtë mënyrë do të mund të fitojnë vetë për të përballuar shpenzimet e rehabilitimit.

“Është një lajm shumë i mirë për ne. Me ato para që mund të fitojmë do të mbulojmë shpenzimet që kanë familjarët”, tha një prej të dënuarve.

I pranishëm në burgun e Reç ishte i pranishëm, ministri i drejtësisë Ulsi Manja i cili njoftoi dhe heqjen e masave kufizuese anticovid dhe lejimin e takimeve, me përjashtim të lejeve shpërblyese.

Që prej fillimit të pandemisë për rreth 2 vite të burgosurit u privuan nga takimet fizike me të afërmit si masa mbrojtëse nga COVID-19.