Mehaj reagon pas armatimit të Serbisë: Po e rrezikon paqen e sigurinë në rajon

Ministri i Mbrojtjes Armend Mehaj ka reaguar pas raportimeve për blerjen e armatimit nga ana e Serbisë, duke thënë se me këtë ajo po e rrezikon paqen dhe stabilitetin në rajon e më gjerë.

Ai në një postim në Facebook u ka bërë thirrje NATO-s, BE-së dhe OKB-së që të shqyrtojnë me seriozitetin maksimal qasjen destruktive dhe të rrezikshme të Serbisë.

“Me blerjen e sistemeve raketore dhe armatimit të ri nga Kina, si dhe sistemeve të mëhershme nga Rusia, rikonfirmohet fuqishëm edhe njëherë sjellja destruktive, shumë e rrezikshme dhe antiperëndimore e Serbisë”, ka shkruar ai.

Sipas informacioneve të dy ditëve të fundit, Serbia ka pranuar nga Kina sisteme të reja të armatimit duke shtuar kontingjentin e saj të mëhershëm të pranuar nga Rusia e Bjellorusia.

“Kjo shfaqje e neveritshme po ndodh në kohën kur BE dhe NATO dhe gjithë bota pro- vlerave euroatlantike është në përballje me sulmuesin e këtyre vlerave, Rusinë dhe aleatët e saj. Nga kush rrezikohet Serbia, apo kundër kujt armatoset Serbia me sistemet më të avancuara sulmuese dhe mbrojtëse?”, ka shkruar Mehaj.

Ai thotë se Kosova ka shprehur në vazhdimësi shqetësimin e arsyeshëm ndaj qasjes destruktive dhe të rrezikshme të Serbisë ndaj paqes, sigurisë dhe stabilitetit në rajon dhe më gjerë.

LEXONI GJITHASHTU:

• Presidenca e Kosovës reagon ndaj transportit të armëve kineze në Serbi