Qëllimet tona në Ukrainë janë fisnike, thotë Putin

Presidenti rus Vladimir Putin ka thënë se pushtimi i tij në Ukrainë do të arrijë ato që ai i quajti ‘qëllime fisnike’.

Duke folur së bashku me liderin bjellorus, Aleksander Lukashenko, Putin tha se një përplasje me Ukrainën ishte bërë e pashmangshme, raporton BBC.

Putin u shpreh se nuk i kishte mbetur zgjidhje tjetër veçse të niste pushtimin në një përpjekje për të mbrojtur rajonin rusishtfolës të Donbasit.

OKB thotë se 10 milionë njerëz janë larguar nga shtëpitë e tyre që nga fillimi i pushtimit.

Por gjatë një daljeje publike me rastin e 61-vjetorit të Yuri Gagarin që u bë njeriu i parë në hapësirë, Putin këmbënguli se forcat e tij po ndihmojnë njerëzit e shtypur në rajonet separatiste të Ukrainës.

“Nga njëra anë ne po ndihmojmë dhe po shpëtojmë njerëzit, dhe nga ana tjetër thjesht po marrim masa për të garantuar sigurinë e vetë Rusisë”, këmbënguli 69-vjeçari.

“Është e qartë se ne nuk kishim zgjidhje. Ishte vendimi i duhur”, tha ai, duke shtuar se “qëllimet janë krejtësisht të qarta, ato janë fisnike”.

LEXONI GJITHASHTU:

• Rusia nuk planifikon të izolohet nga pjesa tjetër e botës, thotë Putin
• Kancelari austriak takim ‘jo miqësor’ ballë për ballë me Putinin