Gjyqi i sulmeve në Paris, i pandehuri u kërkon falje viktimave

I pandehuri kryesor në gjyqin për sulmet terroriste në Paris u ka kërkuar falje familjeve të viktimave.

Salah Abdeslam është në gjyq, së bashku me 13 të tjerë, për sulmet e nëntorit të vitit 2015 në kryeqytetin francez ku u vranë 130 njerëz.

32-vjeçari dyshohet se ishte i vetmi i mbijetuar i të ashtuquajturës celulë terroriste e Shtetit Islamik që kreu sulmet.

Në ditën e fundit të dëshmisë së tij, Abdeslam kërkoi falje dhe shprehu ngushëllimet e tij për viktimat.

“Historia e 13 nëntorit është shkruar me gjakun e viktimave. Është historia e tyre dhe unë kam qenë pjesë. Ata janë të lidhur me mua dhe unë jam i lidhur me ta,” – tha ai me zërin që i dridhej në Gjykatë.

Abdeslam tha në gjyq se ai kishte për qëllim të shpërthente një rrip vetëvrasës natën e sulmeve, por ndryshoi mendje.

I pyetur nga avokati i tij mbrojtës nëse është penduar që nuk ka zbatuar planin e tij, ai i tha gjykatës:  “Nuk jam penduar, nuk i kam vrarë ata njerëz dhe nuk kam vdekur”.

Gerard Chemla, një avokat për njëqind viktima, tha se as ai dhe as klientët e tij nuk ishin “të prekur” nga dëshmia e të pandehurit.

Sipas tij ai qau për miqtë e tij dhe për veten, jo për viktimat.

Në sulmin më të keq në tokën franceze që nga Lufta e Dytë Botërore, nëntë burra shënjestruan bare, restorante, sallën e koncerteve Bataclan dhe stadiumin Stade de France më 13 nëntor 2015. Të gjithë sulmuesit ose vranë veten ose u qëlluan për vdekje nga policia franceze.

LEXONI GJITHASHTU:

• 6 vjet nga sulmet terroriste, Franca kujton 130 viktimat e atentateve që tronditën Parisin