Apeli i ri për politikën, SHBA nuk tërhiqet nga objektivat: Populli shqiptar foli, drejtësia të ecë përpara

Ambasada e Shteteve të Bashkuara të Amerikës në Tiranë ka reaguar sërish për çështjen e reformës në drejtësi. Me një shënim në faqen zyrtare në “Facebook”, ambasada shprehet se SHBA është e përkushtuar që ky mision të ecë përpara.

Gjithashtu ajo fton aktorët vendorë që të mbështesim dhe ta çojnë përpara këtë reformë, duke shtuar se kjo është një ndër kushtet kryesore që Shqipëria të anëtarësohet me të drejta të plota në familjen e Bashkimit Evropian.

“Shtetet e Bashkuara mbeten vendosmërisht të përkushtuara ndaj reformës në drejtësi, e cila është kërkesë e popullit shqiptar. Në përgjigje të kësaj kërkese, në vitin 2016, Parlamenti miratoi unanimisht ligjet themelore për reformën. Prej atëherë, janë ngritur institucione kyçe dhe zbatimi vazhdon për t’i bërë ato funksionale. Reforma është e dhimbshme, e ngadaltë dhe e papërsosur por është e nevojshme. Reforma në drejtësi po ecën përpara dhe duhet të vazhdojë, në mënyrë që Shqipëria të bëhet anëtare e plotë e familjes europiane. E gjithë Ambasada e Shteteve të Bashkuara të Amerikës do të vijojë të mbështesë synimin e popullit shqiptar. Ne nuk duhet të humbasim përqëndrimin, ne nuk duhet të çorientohemi – synimi është i qartë, populli shqiptar foli dhe reforma në drejtësi duhet të ecë përpara, hap pas hapi”, shkruan ambasada.

Ambasadorja e Shteteve të Bashkuara të Amerikës, Yuri Kim, ka apeluar vazhdimisht që kapitulli i drejtësisë të ketë përparësi kryesore. Pak ditë më parë ajo hodhi dyshime të forta për një marrëveshje të fshehtë mes palëve politike, që sipas saj, kishte për qëllim “vrasjen” e reformës në drejtësi.

Deklarata e kryediplomates së SHBA në Shqipëri u mbështet nga kryeministri Edi Rama, kurse lideri i opozitës, Lulzim Basha ka theksuar se çdo ndryshim ligjor, i cili bëhet nga parlamenti aktual është tërësisht ilegjitim.

Lexoni gjithashtu: 

Apeli i fortë i Yuri Kim: Jepini fund lojërave politike, nuk ka pazar me reformën zgjedhore dhe atë në drejtësi

Marrëveshje të fshehtë për të vrarë reformën në drejtësi? Yuri Kim: Shpresoj të mos jetë e vërtetë

Deklarata e Yuri Kim për reformën në drejtësi, Andoni: SHBA ka burime që ne nuk i kemi, po rishfaqen kulisat

“Marrëveshje për të vrarë drejtësinë”, Rama mbështet Yuri Kim: Ferri është bosh, djajtë janë këtu