Sytë nga Bundesliga, Bayern synon “të arratiset” nga përballja direkte me Dortmundin

Tifozët e futbollit nuk duhet të presin më. E marta rezervon një prej përballjeve më interesante në Evropë, teksa në stadiumin Signal Iduna ParK Dortmundi pret Bajernin, në një sfidë ku mund të vendoset shumëçka për fatin e titullit kampion.

Bavarezët ndodhen 4 pikë përpara verdhezinjve dhe një fitore direkte ndaj tyre do t’i jepte një avantazh shumë më të madh për të mbrojtur fronin.

Dortmundi kërkon të marrë hak për humbjen e fazës së parë, ku Bajern triumfoi 4-0, por nuk do të jetë aspak e lehtë. Të dyja skuadrat kanë arritur t’i fitojnë dy ndeshjet e fundit pas rikthimit, duke sinjalizuar se forma në të dyja skuadrat është mjaft e mirë.

Një sfidë në distancë dhe mes dy sulmuesve, Robert Lewandowski dhe Erling Haaland, të cilët këtë sezon kanë marrë përsipër të udhëheqin skuadrat e tyre. Në një stadium të boshatisur dhe pa atmosferën e zakonshme, sytë e gjithë botës do të jenë në stadiumin e Dortmund, ku premtohet spektakël pas më shumë se dy muajsh pritje.